استراتژی معین ایلکه‌لر ایله مقصده چاتمانین یولونو گؤسترن شعورلو و بیلینج‌لی بیر یول پلانی‌دیر. استراتژی بیر دوشون‌مک طرزی، قرار وئرمه شابلونو و ساواش صنعتی‌دیر. گونده‌لیک فعالیت‌لرین اوستونه چیخیب، بؤیوک منظره‌نی و افق‌دان سونراسینی گؤروب، اوزون مدت‌لی اوغور قازانماق‌دیر. اوزاق‌داکی شئی‌لری یاخین‌دای‌میش کیمی گؤروب، یاخین‌داکی‌نا اوزاق‌دان باخماق‌‌دیر. پلانلامانین باشلانقیج نقطه‌سی‌دیر. بیر هدفه گئدن یولو و پلانی دوشونوب، پلانا صادق قالماق‌دیر. قازانارکن بئله پلانی کؤلگه‌ده بیراخ‌ماماق‌دیر. نه‌لر ائده‌جه‌ییمیز قدر نه‌لر ائت‌مه‌یه‌جه‌ییمیزی ده بیلمک‌دیر. احتیاج اولمایانی اورتادان قالدیریب، احتیاج اولانا تمرکز ائتمک‌دیر.
استراتژی‌سیز ساواش مغلوبیت‌دن اؤنجه‌کی بیر گورولتودور.استراتژیسی اولمایان، دشمنین پلانینین بیر پارچاسی اولار. دشمنین پلانینین بیر پارچاسی اولوب، گوج‌لن‌مه‌سینه یول آچانین دا اؤزو محو اولار. استراتژی‌ده چیخمازا گیرن بیر حرکتی، هیچ بیر ایلکه، تاکتیک و ائیلم قورتولا بیلمز، آما ان گوجلو استراتژی ده، اؤزو اؤزونو اجرا ائده‌بیلمز. هدفه چاتماق اوچون ایسته‌ییب، اینانیب، خیال ائدیب، طرح توکوب، پلانلاییب و جسارت‌له حرکته گئچمه‌لی‌ییک. بو دنیا بیزه دوشونجه‌لریمیز قدر ده‌ییل، حرکتیمیز قدر وئره‌ر.
