استراتژی‌لر و پلانلار، اساسا گیزلی اولار و آچیق شکیلده بیان ائتمه‌یه احتیاج یوخدور. هر میللی تشکیلات و گروه، اؤز امکانلاری چرچیوه سینده اؤزونه مخصوص استراتژی‌‌سی‌نی پلانلاییب، اؤز استراتژیسی اساسیندا حرکته گئچر. آنجاق بورادا گونئی آذربایجانین سوسیال قورولوشو و زامانین شرط‌لرینه اویغون، عمومی بیر استراتژی‌دن سوز ائدیریک.
گونئی آذربایجان خالقی آنجاق بؤیوک بیر عصیان‌لا، گونئی آذربایجاندا یؤنتیمی اؤز الینه گئچیریب میللی دولتینی قورابیلر. بو هدفه چاتماق اوچون یعنی بؤیوک خالق عصیانی‌نی باشلادیب، گونئی آذربایجان میللی دولتینی قورماق اوچون، گوجه‌لن‌مه‌لی‌ییک و گوجوموزون قایناغی دا میللتیمیز یعنی گونئی آذربایجان تورک‌لری‌دیر. یالنیز بو پتانسیل گوجو حرکته گئچیره‌رک، میللی دولتیمیزی قوروب، هدفیمیزه چاتا بیلریک. بونون اوچون هدفیمیز و ایلکه‌لریمیز دوغرولتوسوندا خالقیمیزی سوسیال، سیاسی و لازم اولورسا نظامی گوجه چئویرمه‌لی‌ییک. خالقیمیزین بوتون کسیم‌لرینی، قیز-اوغلان، اوخوموش-اوخومامیش، وارلی- یوخسول، دیندار-لاییک، یاشلی- جوان و … دئمه‌دن اویاندیریب، سفربر ائدیب، بؤیوک عصیانا حاضرلامالیییق.
گونئی آذربایجان میللی حرکیتی بو گونه قدر عمومیت‌ده اویانیش حرکاتی شکلینده مجادله ائدیب‌دیر. اویانیش مرحله‌سی نتیجه‌سین‌ده بوگون میللتیمیزین چوخونلوغو اویانیب، تورک‌لویونون فرقینده اولوب و اؤز هویتینی سئومه‌یه و مدافعه ائتمه‌یه باشلاییب‌دیر. بوندان سونرا، اویانیش حرکاتی‌نین دوامی ایله برابر، سفربرلیک مرحله‌سی ده سرعت‌لن‌مه‌لی‌دیر. گوجلو شبکه‌لر، تابان اؤرگوت‌لن‌مه‌سی و قورومسال‌لاش‌ماق بو مرحله‌نین ان اساس وظیفه‌سی‌دیر. میللی فعاللارین اشتراکی و اداره‌سی ایله خالقیمیزین فرقلی کسیم‌لرین‌‌ده، گیزلی یا دا قانونی گروهلار و تشکیلاتلار اولمالی‌دیر. صنفی، فرهنگی، سیاسی، محیط زیستی و … قورولوشلار، میللی فعاللارین یاردیمی ایله یارادیل‌مالی‌دیر یا دا میللی فعاللارین ائتکی‌سی آلتینا گئچ‌مه‌لی‌دیر. میتینگ‌لر، اعتراضلار، تحصن‌لار، فرهنگی برنامه‌لر و دیگر فعالیتلر ایله، هم شبکه‌لریمیزی گئنیش‌لن‌دیر‌مه‌لی‌ییک، هم خالقیمیزی بؤیوک عصیانا حاضرلامالیییق، هم ده ایرانین گونئی آذربایجان‌داکی گوجونو توکت‌مه‌لی‌ییک.
استراتژی‌نین اجراسی و باشاری‌سی اوچون دوغرو پولیتیکالار بلیرلن‌مه‌لی‌دیر. استراتژیک پولیتیکالار، پلان‌لاریمیزین و تاکتیک‌لریمیزین باشاری اؤلچوسو و شابلونودور. پلانلاریمیز، نه قدر پولیتیکالاریمیز دوغرولتوسوندا ایلرله‌مه‌یه سبب اولموش‌سا او قدر باشاریلی ساییلار. گونئی آذربایجان میللی حرکتینین بعضی اؤنم‌لی استراتژیک پولیتیکالاری بونلاردیر:
میللتی سیاسی‌لش‌دیر و حرکته گئچیر
ایران حکومت‌لری بیلینج‌لی اولاراق خالقیمیزا سیاست‌ین فایداسیز و تهلکه‌لی اولدوغونو تلقین ائدیب، اونلاری پاسیولش‌دیرمه‌یه چالیشیر. بونون اوچون، میللی حرکتیمیزین اساس استراتژی‌لرین‌دن بیری میللتی اکتیو سیاسته و سیاسی فعالیته چکمک‌دیر. میللتین قلبینی و ذهنینی قازانیب، اونلاری حرکتین فعاللاری و یارادانلاری ائتمه‌لی‌ییک. تاکتیک‌لریمیز نه قدر خالقیمیزی سیاسی‌لش‌دیریب، میللی مجادله‌یه جذب ائدیب، حرکته گئچیرسه، او قدر باشاریلی ساییلار.
ایرانچیلیغین ایدئولوژیک نفوذونو چوروت
“ایران‌دا یاشایان خالقلار بیر میللت‌دیر، اورتاق سرنوشتی وار و اورتاق دیللری فارسجادیر” بو جمله، ایران‌چی‌لیق تئوریسنین اساسی‌دیر. بو یانلیش تئوری، گونئی آذربایجانین استثمار اولونماسی و مستعمره کیمی قالماسی‌نین اساس سببی‌دیر. میللتیمیز بو تئوری‌یه ایناندیغی مدت‌جه، حرکته گئچمز و اؤز سرنوشت‌ینی اؤز الینه آلماز. بونون اوچون بو تئورینین یانلیش اولدوغونو خالقیمیزا گؤستریب، چورودوب، یوخ ائتمه‌لی‌ییک. فرقلی تاکتیک‌لر ایله گونئی آذربایجانین فرقلی میللت اولدوغونو، ایرانین باشقا خالقلاری ایله عینی چیخارلاری و سرنوشتی اولمادیغینی، حتی راسیست ایران دولت‌چی‌لی‌یی تورک و آذربایجان دشمنی اولدوغونو گؤسترمه‌لی‌ییک. میللتیمیزین فارس دیلینه ده‌ییل، اؤز تورک دیلی و مدنیتیه باغلی اولدوغونو گؤستریب هر کسه ایناندیرمالی‌ییق. فعاللیریمیز دا بو تئورینین دوغرولتوسوندا قورولموش ائیلم و بیرلیک‌لردن اوزاق دورمالی‌دیر.
ایرانین اوتوریته‌سینی گونئی آذربایجاندا ضعیف‌لت
استثمارچی دولتلر مستعمره‌لرینی، یئرلی انسانلارین یاردیمی ایله اداره ائدرلر. بونون اوچون، استثمارچی‌نین پروپاگانداسینا اینان‌میش، اونو گوجلو و عدالتلی بیلن یئرلی انسانلاری سئچیب، اونلارین واسطه‌سی ایله اتوریته‌لرینی تامین ائدرلر. هر باشاریلی میللی حرکتینین ان اؤنم‌لی استراتژی‌لرین‌دن بیری، اؤزوندن اولان آما دشمنه چالیشان اولادلارینین اوزه‌رین‌ده دشمنین حاکمیتینی ضعیف‌لت‌مک و میللی حرکتینه جذب ائتمک، یا دا ان آزیندان استثمارچی‌یا اولان باغلی‌لیغینی و اطاعت‌ینی آزالتماق‌دیر. ایرانین دولت ارگان‌لارین‌دا چالیشان، گونئی آذربایجان‌لی بوروکرات‌لار، کارمندلر، معلم‌لر، مدیرلر، پلیس‌لر، سپاهی‌لر، ارتشی‌لر، قاضی‌لر، اطلاعات مامورلاری و باشقالاریندا، نه قدر ایران باغی آزالیب، میللی دوشونجه چوخالسا، ایرانین گونئی آذربایجانی اداره ائتمه قابلیتی او قدر آزالاجاق و اوتوریته‌سی ده او قدر ضعیف‌له‌یه‌جک.
دیپلماسی ایله حرکته مشروعیت و دستک قازان
بو استراتژی اساسیندا، میللی حرکتیمیزین مشروعیتی، رسمیته تانینماسی و اؤنونون آچیل‌ماسی‌نا چالیش‌مالی‌ییق. بونون اوچون خارجی اؤلکه‌لر، بین‌الخالق تشکیلاتلار و انسان حق‌لرینی مدافعه ائدن گروه‌لارلا ارتباطا گئچمه‌لی‌ییک. لوبی‌چیل‌یک، کامپانیالار، مطبوعات بولتن‌لری، مدیا راپورتاژلاری و سوسیال مدیا دالغالاری ایله، بین الخالق آلقی‌نی گونئی آذربایجان خیرینه شکیل‌لن‌دیرمه‌لی‌ییک. گونئی آذربایجاندا انسان حق‌لری احلالی و باشقا جنایت‌لر ایله ایلگیلی، بین الخالق محکمه‌لره و قوروملارا باش وورمالی‌ییق. و …
مجازی دنیادا حاکمیتی نی قور
سوسیال مدیا و مجازی دنیا، دولت‌لرین حاکمیتی آلتیندا اولمایان تک محیط‌دیر. بو گون انسانلاریین ارتباطی، بیلگی پایلاشیمی و سوسیال‌لش‌مه‌سی‌نین چوخو بو اورتاملاردا اولور. سوسیال مدیا و مجازی دنیا، ان بؤیوک آوانتاژیمیز اولمالی‌دیر. خالقیمیزین ایچریک احتیاجلاری، میللی حرکتین کانللاریندا تامین ائدیل‌مه‌لیدیر. سوسیال مدیا شبکه‌لری ایله خالقیمیزی شبکه‌لن‌دیریب، اؤرگوت‌له‌مه‌لی‌ییک. گونئی آذربایجاندا گوندم، میللی حرکتین کانال‌لاری ایله اداره اولونمالی‌دیر.
