ایلکه‌لر، میللی حرکتیمیزین تارتیشماسیز قبول ائدیلن آنا دوشونجه‌سی، اؤنجو پرنسیب‌لری و اصول‌لاری‌دیر. بو ایلکه‌لر گونئی آذربایجان میللی حرکتینین اساسینی تشکیل ائدیر و حرکتیمیزین هدفینه چاتماسیندا اؤنملی بیر رول اویناییر. اونلار دوروشوموزون کؤکو، کاراکتریمیزین اونورغاسی، دوغرو یولو تاپماغین پوسولاسی و مجادله‌میزین قانونلاریدیر. ایلکه‌لر، اولدوزلار کیمی یولوموموزو گؤستریب، میللی حرکتیمیزی بلیرسیزلیک‌لردن و قارماشالاردان قورتاریب، دوزه‌نی و اویومو ساغلار. ان چالخانتی‌لی زامانلاریمیزدا بئله، ایلکه‌لریمیزه دایاناراق، حرکت ائتمهلیییک و ایلکه‌لر سؤز قونوسو اولدوغوندا اؤدون وئرمه‌‌دن داغ کیمی دورمالی‌ییق.
ایلکه‌لر، آلاجاغیمیز قرارلارین قانونلاریدیر، هر حرکتیمیز و داورانیشیمیز، اونلارا دایالی و هدفیمیزه دوغرو اولمالیدیر. یعنی تورک‌لویه، آذربایجانا و خالقیمیزا دایاناراق، عدالت، اؤزگورلوک و اخلاقی ده‌یرلری دقته آلاراق، تشکیلات روحونا ساریلاراق، یئنیلیک‌چی پلانلار ایله، میللی هدفه دوغرو حرکته گئچیب، مجادله ائتمهلیییک. میللی دولت آندیمیز، ایلکه‌لر ایسه اؤنجه‌لیک‌لریمیزدیر. اؤنجه‌لیک‌لر، فرقلی انسانلار و یا تشکیلات‌لاردا، فرقلی درجه‌ده اولا بیلر. سول دوشونجه‌لی بیری اوچون عدالتین داها چوخ اؤنمی اولار، لیبراللار اوچون اؤزگورلوغون، تورکچولر اوچون تورک‌لوغون، وطن‌پرورلر اوچون آذربایجانین، دیندارلار اوچون اخلاقین. بونلارین هامیسی، دیگر ایلکه‌لره قارشی اولماییب میللی هدفیمیز دوغرولتوسوندا اولدوقجا، نورمالدیر و حرکتیمیزین ایچینده ده‌یرلندیریلیر. آنجاق بو ایلکه‌لر بیر بوتون‌دور و یولوموزو ایشیقلاندیران اولدوزلاردیر. گونئی آذربایجان یئرینه ایران و ایران‌چی‌لیق اوچون مجادله ائتمک یا دا ایلکه‌لریمیزین هر هانسی بیرینه قارشی اولماق یا دا اونلاردان بیرینی هدف یئرینه قویوب، یالنیز اونون اوچون مجادله ائتمه‌یین آدی گونئی آذربایجان میللی حرکتی ده‌ییل. بورادان یولا چیخاراق، ساغ، سول، لیبرال، فمینیست، لائیک، دیندار و … دوشونجه و مکتب‌لری ده‌یرلن‌دیرمک اوچون، گونئی آذربایجانین اولماق ایله گونئی آذربایجانلی اولماغی آییرمالی‌ییق. گونئی آذربایجانین ساغی، سولو، لیبرالی، لائیکی، دینداری، فمینیستی، دوغاچی‌سی و …، گونئی آذربایجان میللی حرکتینین اصیل صاحیب‌لری‌دیر. آما دوغوم یئری سببی ایله آذربایجانلی اولوب حتی تورک دیلینی چوخ یاخشی بیلن، ایران سولچوسو، ایران ساغچی‌سی، ایران تورکچوسو، ایران لیبرالی، ایران لائیکی، ایران دینداری و …، گونئی آذربایجان میللی حرکتیندن ده‌ییل، حتی میللی حرکتیمیزه ان بویوک ضرر وئرن‌لردن‌دیرلر. چونکو اونلار میللتیمیزین حق‌لی طلب‌لرینه قارشی، فاشیست‌لرین الینده‌کی ان گوجلو چوماق‌لاردیر. گونئی آذربایجان اوچون اوره‌یی چیرپینان، ایلکه‌لریمیزه قارشی اولمایان، گونئی آذربایجانین میللی دولتینین قورولماسی اوچون مجادله ائدن هر کس ویا تشکیلات، گونئی آذربایجان میللی حرکتینین بیر پارچاسی و صاحبی‌دیر. گونئی آذربایجاندا قورولاجاق دولتین ساغ، سول، لیبرال، لاییک و … دوشونجه اساسیندا ایداره اولونماسینی ایسته‌مک ده هر گونئی آذربایجان میللی فعالی‌نین طبیعی حقی‌دیر.
ایلکه‌لریمیزین بیرینی هدف کیمی گوستریب، گونئی آذربایجان میللی حرکتینین اصیل هدفیندن و باشقا ایلکه‌لریندن گئچمک، بیزی هم گئرچک هدفیمیزدن، هم ده ایلکه‌لریمیزدن اوزاق‌لاش‌دیرار و میللتیمیز اوچون ده هیچ بیر فایداسی اولماز. گونئی آذربایجان میللی حرکتی، یالنیز دموکراسی اوچون مجادله ائدن، یالنیز عدالت اوچون مجادله ائدن یا دا یالنیز رژیمی ییخماق اوچون مجادله ائدن بیر حرکت ده‌ییل. گونئی آذربایجان میللی حرکتی، دموکراتیک، چاغداش و انسانی ایلکه‌لره دایانان بیر قورتولوش مجادله‌سیدیر، دموکراسی یا دا عدالت شووالیه‌سی ده‌ییل. بیز ایراندا و یا هر هانسی بیر جغرافیادا اولان حکومت‌لرین عدالتلی و داها دموکراتیک اولماسینی دستک‌له‌ییریک. آما اونون اوچون ساواش‌میریق، ائله بیر داوامیز و هدفیمیز ده اولابیلمز. بیز یالنییز میللی دولتیمیز قورولدوقدان سونرا، اؤز دولتیمیزین داها دموکراتیک و عدالتلی اولماسی اوچون، مدرن پارتی‌لر قوروب، مجادله ائده‌جه‌ییک.
ایلکه‌لر
