اخلاق بیر توپلومدا یاخشی-پیسی، دوغرو-یانلیشی و اویغون-ایغونسوزو بیر بیرینده آییران ده‌یرلر و ائتیک‌لردیر. اخلاق، توپلومسال تجربه‌لر و وجدانیمیزدان قایناق‌لانان و توپلومون، عادت، عنعنعه و اینانج‌لارینا گیرمیش، دایانیشما روحودور. اخلاق هر کسین ائتدی‌یی شئیلر ده‌ییل، هر کسین ائتمه‌سی گرکن شئی‌لردیر. اخلاق میللت‌لری چؤکمک‌دن قورتاریب، محافظه ائدن دوغال بیر قورتاریجیدیر. اخلاق و اردم، قرارلاریمیز و عمل‌لریمیزین رهبری، دوغرو اداره‌نین اساسی، یاخشی‌لاری الده ائتمه‌یین گوجو و میللی روحون زینتی‌دیر. اخلاق‌چیلیک، اؤز خالقینا مسئولست حسی دویوب، ائدیله‌جک دوغرو ایله، ائدیل‌مه‌یه حقین اولانلارین آراسینداکی فرقی بیلمک‌دیر. یعنی شخصی منفعت‌لر آردینجا گئتمک یئرینه، میللتیمیزین و میللی حرکتین چیخارلارینا آدانماقدیر.
باشاری، اخلاق‌دان سونرا گلر. میللی حرکتیمیز، ایچدن گلن بیر سئوگی، اخلاق و عقلانیت ایله اداره اولونماسا، چؤکوب یوخ اولار. میللی حرکتیمیزین ایلرله‌مه‌سی، یالنیز بؤیوک ائیلم‌لر و تشکیلاتلارین قورول‌ماسینا باغلی ده‌ییل، میللی فعاللاریمیزین اخلاقی ده‌یرلرینه ده باغلی‌دیر. چونکو بیر حرکتین ده‌یری، اونو مدافعه ائدن انسانلارین ده‌یری قدر اولار. بؤیوک داوالار، شخصیت‌لی و اخلاقلی اینسانلارین چیگیین‌لرین‌ده ظفره یئتیشر. گونئی آذربایجان میللی حرکتی، یانلیش و اویغونسوز داورانیشلاردان اوزاق دوران، اخلاقلی و ائتیک انسانلارین حرکتی‌دیر. اخلاق و سیاسی ائتیک، عینی زاماندا بیر لیدرلیک مسئله‌سی‌دیر. دوغرو لیدر، اخلاق و سیاسی ائتیک نمونه‌سی اولار و توپلومون اساس قورولوشو و ده‌یرلرینین ضعیف‌له‌مه‌سینه سبب اولماز و باشقالارینین دا ضعیف‌لت‌مه‌سینه اجازه وئرمز. یالنیز اؤزونون دوغرو بیلدی‌یی اخلاقی ده‌یرلرله ده‌ییل، یایغین شکیلده خالقیمیز طرفیندن قبول ائدیلن اخلاقی ده‌یرلره ده دقت ائدیب اونلاری سیاسی گوجه چئویرر.
هر میللی فعال، یئنی بیر حیات و بویوک ایده‌آل‌لار اوچون موجادله ائدن، توپلوما یؤن وئرمه‌یه چالیشان، اینسانلارین باخیش‌لارینی، داورانیش‌لارینی و تپکی‌لرینی شکیل‌لن‌دیرمه‌یه چالیشان، ایلکه‌لی و اینانج‌لی بیر انسان‌دیر. داواسینی آنلایان، داواسینا اینانان، داواسینی اؤز حیاتیندا یاشایان و گوجو یئت‌دی‌یی قدر، داواسینی باشقالارینا آنلاتان، ایلکه و عمل صاحبی اولان، اخلاقلی بیر انسان‌دیر. گونئی آذربایجان میللی فعالی، انسانلارین حیاتینا تاثیر ائدن هر فعالیتینده، اخلاق چرچیوهسینده اول‌مالی‌دیر و گنل اخلاق، سیاسی ائتیک‌لر و مسئولیت اخلاقی چرچیوهسینده فعالیت ائتمهلیدیر. بورادا سؤز قونوسو، اخلاق نمونه‌سی اولماق ده‌ییل، میللی حرکتی‌میزی سورو آلتینا آپاراجاق داورانیشلاردان و خالقیمیزین اینانج و یاشام طرزینه تحقیر و حرمت‌سیزلیک‌دن اوزاق دورماغی قصد ائدیریک. چونکو هر میللی فعال، گونئی آذربایجان و تورکلویون بیر بایراغی‌دیر، بایراغیمیزین لکه‌لن‌مه‌سینه اجازه وئرمه‌مه‌لی‌دیر. سیاسی ائتیک اولاراق وظیفه‌لرین عدالت‌لی و طرفسیز پایلاشیمینی ساغلاییب، اؤز وظیفه‌لرینه ده صداقت‌لی و توتارلی شکیلده عمل ائتمهلیدیر. اونون‌لا فرقلی دوشونن میللی فعاللار و تشکیلاتلارا آلچال‌دیجی سوزلر دئمه‌مه‌لی‌دیر و افترا آتمامالی‌دیر. باشقاسینا تنقید ائتمه‌دن اؤنجه اؤزونه باخمالی‌دیر. ائتدیغی ایشلرین و نتیجه‌لرینین مسئولیتینی قبول ائتمهلیدیر. ائقودان، تکبردن و حرص‌دان اوزاق دورمالی‌دیر. بونو بیلمه‌لی‌دیر کی نه قدر چالیشقان و میللی حرکت‌یمیزه فایدالی و اؤنم‌لی بیری اولسا دا، حرص‌لاری، ایده‌آل‌لرینین اؤنونه گئچسه، ایستر ایستمز، یا اطرافی داغیلار، یادا میللی فعالیت‌دن گئری چکیلمک مجبوریتیده قالار. ائله میللی حرکتیمیز ده، اصیل او زامان ضرر گؤره‌ر.
سیاسی فعالیت‌لرین بؤیوک فلاکت و دردلره سبب اولما احتمالی یوکسک‌دیر. فعالیت و ائیلم‌لریمیزین، ایسته‌مه‌یرک اولسا دا، سبب اولدوغو یانلیش‌لیق‌لار و دردلرین مسئولیتین‌دن قاچما حق‌یمیز یوخدور. هدف‌یمیزین بؤیوکلویو و نیت‌یمیزین یاخشی اولماسی، بیزه اونلارین نه قیمته اولورسا اولسون ائتمه حق‌ینی وئرمز. بونون آدی سوروملولوق اخلاقی‌دیر. گوج‌لن‌مه‌یه چالیشیرکن، اؤزلویوموزو، ائتیک‌لریمیزی و عدالت دویغولاریمیزی آیاق آلتینا آلمامالی‌ییق. اخلاق شخصی بیر دیسیپلین‌دیر، باشقالارینی یا دا تشکیلاتیمیزی اؤز دیسیپلین‌سیزلی‌ییمیزدن و یانلیش‌لاریمیزدان مسئول توتامامالی‌ییک.
اخلاق‌چی‌لیق
