بیز تورکلرین میللت و وطن سئوگیسی، آللاهین بیزه وئردیغی بیر هدیه‌دیر. بئله‌سی آلوولو وطن سئوگیسی هر میللت‌ده اولماز. وطنپرورلیک دویغوسونو یاشامایان میللت‌لر، تاریخ‌ده یوخ اولماغا محکومدور. وطن بیر میللتین ائوی‌دیر و انو سئومک، آنا بابا سئوگیسی قدر طبیعی‌دیر. آذربایجان، تورپاغینین قارا باغریندا سیرا داغلار کیمی دوران و تاریخ بویو اونون اوچون جانینی فدا ائدن تورکلرین وطنیدیر. آذربایجان‌چیلیق دا، آذربایجان تورک‌لرینین وطن سئورلیک دویغوسونون آدیدیر. آذربایجان‌چیلیق، وطنین داشینا، داغینا، توپراغینا جان فدا ائتمکدیر. باغینا، بوستانینا، حتی قورو چؤلونه عاشق اولوب، بو وطنین چئوره‌سی‌نی و گؤزه‌للیک‌لرینی قورماق‌دیر. دیلینه، دینینه و دوشونجه‌سینه باخمادان بو توپراق‌لاردا یاشایان بوتون انسان‌لاری سئومک‌دیر. اؤز وطنینی، بایراغینی و میللی دولتینی جانین‌دان و مالین‌دان اوستون توتماق‌دیر. آذربایجان‌چیلیق، هم وطن اوچون یاشاماقدیر، هم ده وطن اوچون اؤلمک‌دیر. آذربایجانین آزادلیغی، آنجاق وطن یولوندا هر جور فداکارلیغا حاضر اولان وطن‌سئور انسانلار، یعنی آذربایجانچی انسانلار سایه‌سین‌ده تامین اولوجاقدیر.
اسارت‌دن قورتولماق ایسته‌ین، اؤنجه وطنینی قورتارمالیدیر. بیز گونئی آذربایجان میللی حرکتی اولاراق، اؤز وطنیمیزی اشغال‌دان قورتاریب میللی دولتیمیزی قورماق اوچون موجادله ائدیریک. بیز آذربایجان‌چی‌ییق و گونئی آذربایجان میللی دولتینی قوروب، اونون بؤلونمز بوتوولوغونو قورومایا چالیشیریق. قورولاجاق میللی دولت‌یمیزین آپاریجی میللتی و بؤیوک اکثریتی اولان تورکلرین میللی وارلیغی و بیرلی‌یینی قوروماغا چالیشیریق. بونونلا یاناشی وطنیمیزده یاشایان ائتنیک آز‌لیق‌لارین حاقلارینی قوروماغی دا وطن بورجوموز بیلیریک. بو تورپاق‌لاردا یاشایان هر کسین یاشامایا، مادی و معنوی وارلیغینی قورومایا و گلیشدیرمه‌یه حقی واردیر. دیلینه، دینینه و دوشونجه‌لرینه باخمایاراق وطنیمیزده یاشایان بوتون اینسانلاریمیزی قورویوب، اونلارا، مرفه، اؤزگور و شرفلی یاشام سونماغی بوینوموزون بورجو بلیریک. اونون اوچون هیچ بیر زامان تورپاق‌لاریمیزین و وطنداش‌لاریمیزین هیچ بیر بؤلومونو فاشیست‌لر، تروریست‌لر و عشیرت آغالارینین الینده اسیر بوراخمایاجاییق یا دا رهین اولماسینا اجازه وئرمه‌یه‌جه‌ییک.
آذربایجان سجده‌گاه‌یمیز، تورک‌چولوک ایسه تاجیمیزدیر. تاریخیمیزده تورک‌چولوک و آذربایجان‌چیلیق، روس‌چولوق و فارس‌چیلیغا قارشی مودافعه حرکتی اولموشدور. بوگون آذربایجان‌چیلیغی و تورک‌چولویو بیربیرینه ضد گؤسترمک‌ده ده، یئنه شبهه‌سیز ایران و روسیانین رولو واردیر. تورک‌لویو اله آلیب آذربایجانی انکار ائت‌مک اهانت‌دیر، بونون ترسی ده عینی درجه‌ده غفلت و اهانت‌دیر. وطنین او تایی بو تایی اولماز، تانری بیزه واحید بیر آذربایجان وئریب‌دیر. بو وطنین هر قاریشینی سئویب قورومالییق، یعنی بوتووچو اولمالی‌ییق. آذربایجان‌چیلیق وطنیمیزین آیری دوشموش پارچالارینین بیرلش‌مه سئوداسی‌دیر و اونا مانع اولاجاق هر سوز و حرکت‌دن چکین‌مک‌دیر.
