خالق‌چی‌لیق، خالقین حر اراده‌سی‌نی، دموکراسی‌نین تمل داشی بیلیب، هر شئی‌یین مرکزینه آلماق‌دیر. خالقیمیزا قارشی سوروملولوق و وفا دویغوسودور. خالقیمیزین مادی و معنوی وارلیغینی قورویوب گه‌لیش‌دیرمک‌دیر. خالقین سسینی دویوب، خالقین دیلی ایله سس‌له‌نه‌رک، اونلارین سئوگی، گووه‌ن و دسته‌یینی قازانماقدیر. خالقیمیزین دؤشونجه‌لرینه، اینانج‌لارینا و عادت عنعنه‌لرینه سایقیلی یاناش‌ماق‌دیر. اونلار اوچون هر جور فداکارلیغا حاضر اولوب، یئری گلدی‌یینده، شخصی منفعت‌لردن ال چکمک‌دیر. خالقیمیزی گونئی آذربایجان میللی حرکتینه جذب ائدیب، میللی حرکت‌ده توتوب، بیلینج‌لن‌دیریب، بیرلی‌یینی و دایانیشماسینی ساغلاماق‌دیر.
گئچمیش یوز ایلده، گونئی آذربایجانین بیر چوخ آیدین و اوخوموش انسانی، اؤز میللتینه خیانت ائده‌رک، اشغالچی ایران ایستثمارینین ماشاسی اولوبدور. بوگون خالقیمیزین اوغرادیغی ظلم‌لر، عدالت‌سیزلیک‌لر و فلاکت‌لرین بیر چوخو، ائله اونلارین، عرق‌چی ایران دولتی ایله ایش بیرلیغی نتیجه‌سین‌ده باشینا گلیب‌دیر. بونون اوچون گونئی آذربایجان تورک‌لرینین بیر چوخو، ائلیت و آیدین‌لارا قارشی، حتی اونلار اوچون مالیندان و جانیندان گئچن میللی فعال‌لارا قارشی، گووه‌ن‌سیزدیر و قورتولوشونا دا اومودنو ایتیریب‌دیر . بو اومودسوزلوق دا خالقیمیزین دورغون‌لوغونا سبب اولوب، بؤیوک حرکت‌لر و حمله‌لر قابلیتینی آزالدیب‌دیر. گونئی آذربایجان میللی حرکتی، دوغرو استراتژی‌لر ایله، خالقیمیزین گوون‌ینی قازان‌مالی‌دیر، اونلارا صاحب چیخیب، اونلارین سسی اولاراق، یاردیم‌سیز و حمایت‌سیز اولمادیق‌لارینین گووه‌نینی وئرمه‌لی‌دیر. ازیلن خالقیمیزا، یالنیز اولمادیق‌لارینی گوستریب، آرخالاریندا، دونیا سویه‌سینده بیر سیاسی گوج و میللی حرکتین اولدوغونو گؤسترمه‌لی‌دیر.
خالقیمیز حق‌لرینی آلماق گوجونه صاحب اولدوغونا اینان‌ماسا، حق‌لرینه نئجه یئتیشه‌جه‌یینی ده دوشون‌مز. اونلارا گوج‌لرینی آنلادیب، اومودلان‌دیریب، انرژی‌لرینی میللی حرکتین هدفی یؤنون‌ده سفربر ائدیب سوسیال گوجه چئویرمه‌لی‌ییک. خالقیمیز، گونئی آذربایجان مللی حرکتینین گوجونون گرچک قایناغی‌دیر، اونو استفاده ائده بیل‌مه‌سک ایتیر‌ریک. بونون اوچون، گونئی آذربایجان میللی حرکتی، باشدان سونا قده‌ر خالقین حرکتی اولمالی‌دیر. خالقیمیزین ایزله‌دیغی بیر حرکت ده‌ییل، اویونجو اولدوغو بیر حرکت اولمالیدی.
بیزیم مجادله‌میزین کؤکونده سئوگی وار. بیز میللتیمیزی سئودی‌ییمیز اوچون مجاله ائدیریک. بو دا شخصی چخارلار یا دا باغلی اولدوغوموز تشکیلاتلارین چیخارلاری اوچون پوپولیستی حرکت‌لر ائدیب، انسانلارین دویغولارینی استثمار ائتمک‌له ده‌ییل، خالقیمیزین و گله‌جک نسلین، چیخارلارینی و انسانی حاقلارینی قورویوب، اونلارا خدمت ائتمک‌له اولار. بونون اوچون هر بیریمیز بیر دولت آدامی کیمی، اویغار یاشامین اساسی اولان انسان حق‌لری چرچیوه‌سین‌ده، بوتون خالقیمیزا دموکراتیک بیر دولت و شرف‌لی بیر یاشام ساغلانماسی اوچون مجادله ائتمه‌لی‌ییک. آنجاق بونو دا بیلمه‌لی‌ییک کی، هیچ بیر تشکیلات و حتی گونئی آذربایجان میللی حرکتینین بوتونو، گونئی آذربایجانین بوتون خالقینی تمثیل ائتمیر و اکثریتینین ایسته‌یی ایله حرکت ائتمک مجبوریتینده ده‌ییل. اکثریتین ایسته‌یینه اویماق بیر دولتین وظیفه‌سی‌دیر، بیر تشکیلات یا دا حرکتین وظیفه‌سی ده‌ییل. میللی دولت اولمایانا قدر خالقیمیزین میللی اراده‌سی اورتایا چیخماز و اکثریتین نه ایسته‌دی‌یی ده بللی اولماز. هیچ بیر قورتولوش ساواشی، حقیقتی گؤرن‌لر دیشینداکی اکثریتین اویو ایله قازانیل‌مامیش‌دی. گونئی آذربایجان میللی حرکتی، قورتولوش مجادله‌سی وئرن بیر دوشونجه آخینی و حرکتی‌دیر، گونئی آذربایجانین دولتی ده‌ییل. میللی حرکتیمیز، خالقیمیزین ایچینده‌کی اؤز تابانین دوشونجه و ایستکلرینی تمثیل ائدیر. اؤزونو صمیمیت‌له تورک و آذربایجانلی بیلن، تورکلوک و آذربایجانین منافعی و خوشبخت‌لیغی اوچون اوره‌یی چیرپینان و فداکارلیغا حاضیر اولان انسانلار، بو حرکتین تابانی‌دیر. گونئی آذربایجان میللی حرکتینین اساس گؤره‌وی، اؤز تابانینین ایستکلرینی دیققته آلاراق میللی دولتیمیزین قورولماسی اوچون وار گوجو ایله مجادله ائتمک‌دیر. عینی زاماندا دوغرو استراتژی‌لر و تاکتیک‌لر ایله، خالقیمیزین دیگر بؤلومونو ده، میللی حرکتین دوشونجه‌سینه جلب ائدیب اؤز تابانینا داخیل ائتمک‌دیر. وظیفه‌میز خالقیمیزی اولماق ایسته‌دیک‌لری یئره ده‌ییل، اولماسی گرکن یئره آپارماق‌دیر.
