تورکون ان اؤنملی وصفی اؤرگوت‌چولوک یعنی تشکیلات‌چی‌لیق‌دیر. تشکیلات‌چی‌لیق دایانیش‌مانین، ثمرلی‌لی‌یین و باشارینین آچاری‌دیر. تشکیلات‌چی‌لیق، یولوموزو بلیرله‌ین و بیزی بیرلیک‌ده حرکته گئچیریب، ظفره آپاران ایلکه‌دیر. تشکیلات اولماق، عینی ده‌یرلری پایلاشیب اورتاق بیر هدفه کیلید‌لن‌مک‌دیر. تشکیلات، بلیرلی بیر نظم ایله قورولموش قورم‌سال بیر سیستم و مسئولیت-اختیارات‌ین نئجه بؤلوشدوروله‌جه‌یینی بلیرله‌ین مکانیزمانین آدیدیر. تشکیلاتچیلیغا صرف ائتدی‌ییمیز هر دقیقه، بیزه بیر ساعت قازان‌دیریر. یعنی تشکیلات‌چی‌لیق بیر لوکس و سئچیم ده‌ییل، حیات‌دا قالما باشاریسی و بیر احتیاج‌دیر. آرتیق پهلوان و سوپرمن‌لرین زمانی گئچیب‌دیر، بو گونون شرط‌لرین‌ده، یالنیز تشکیلات و ائکیب چالیش‌ماسی ایله باشاری الده ائدیله بیلر. هدفه چاتماغین یولو گوج‌دن، گوجون یولو ایسه، تشکیلاتلانماقدان گئچر. تشکیلات‌چی‌لیق بیزه عظم ایله چالیشمانین گوجونو وئرر و نه‌لر باجارا بیله‌جه‌ییمیزی اؤرگه‌‌در.
هر تشکیلاتین، بیر روحو و عقلی اولار. تشکیلات روحو، اینسانلارین ائگولارینی ایکینجی پلانا آتیب تشکیلاتین اوغورو اوچون مجادله ائت‌مک‌دیر. تشکیلات عقلی ایسه، بیلگی پایلاشیمی، ایش‌بیرلیک و استراتژیک دوشونجه‌دن یارانان کولئکتیو ذکا و قرار وئرمه قابلیتی‌دیر. تشکیلاتین عقلی تشکیلات‌داکی اینسانلارین عقلیندن داها بؤیوک اولار و اونون روحو بیزه سونسوز بیر خیال گوجو وئرر. اوغورلو بیر حرکت ایله اوغورسوز حرکت‌لرین فرقی، گوج یا دا بیلگی اسکیک‌لی‌یین‌ده ده‌ییل، تشکیلات اسکیک‌لی‌یین‌ده‌دیر. تشکیلات روحو و دایانیش‌ما، آز گوج ایله بؤیوک ایشلر گورمه‌یین تک و ده‌ییشمز چاره‌سی‌دیر. تشکیلات و دایانیش‌ما اولمایان یئرده، ایچدن ایچه بیر چکیشمه اولار.
بیر آرایا گلمک باشلانغیج‌دیر و بیر گروه یارادار. گروه یولداش‌لیق و تانیشلیق ایله قورولار و داها ائلاستیک‌دیر. آنجاق بیر آرادا دوروب، تشکیلات‌لانیب، مسئولیت عهده‌له‌نیب، بیرلیک‌ده چالیشماق، بیر اردم‌دیر. تک باشینا یا دا کیچیک گروه‌لار ایله، آنجاق کیچیک و تاکتیکی باشاریلارا گوجوموز یئتر. وطنی قورتاریب، میللی دولت قوروب حاکمیتی اله گئچیرمک ایسه، آنجاق ساغلام تشکیلاتلانماقدان گئچر. تشکیلات روحو، پول ایله ساتین آلینماز. پول، انسان‌لارین ایشلرینی گوروب حیات‌لارینی دوام ائتمک اوچون بیر وسیله‌دیر آما اونلاری بیر تشکیلات ائتمک اوچون یئترلی ده‌ییل. تشکیلات، یالنیز عضولر ایله دییل، اونلاری بیربیرینه باغلایان گؤرون‌مز باغلارلا قورولار. بو باغلاری قورا بیلمک اوچون اونلاری هیجانلاندیران بیر آماج، شفاف بیر نظام و عدالت‌لی بیر وظیفه-اختیارات سیستمی و امک باغی اولمالی‌دیر. بیر تشکیلات‌دا بو خصوصیت‌لر اولورسا، بوتون امکان‌سیزلیق‌لارا باخمایاراق باشاریلی اولار. چونکو بئله بیر تشکیلات ایله چالیش‌دیغیمیزدا، داها گوجلو خصوصیت‌لره و ائتکی‌یه صاحب اولاریق . اونلار دا هدفه گئدن یولوموزو قیسالدان ان گوجلو سلاحیمیز اولار. دوشمن‌لریمیزین ان قورخدوغو شئی ده، ائله دوغرو تشکیلات‌چی‌لیق سایه‌سینده الده ائده‌جه‌ییمیز بو سلاح و گوج‌دور.
هر گونئی آذربایجان میللی فعالی تشکیلات قورماغی، اولدوغو یئردن باشلامالی‌دیر. تشکیلات اولماق بیر یولچولوق‌دور، هدف ده‌ییل. بو یولچولوغا گیرمک اوچون بیر ویزیونا احتیاجیمیز وار بیر ده جسارته، مکمل اوماغا احتیاجیمیز یوخدور. هاراداسینزسا، اورادان باشلایین، الینیزده اولانلاری استفاده ائدین، الینیزدن گلن ایشی گؤرون. اولدوغونوز مدرسه، اونیوئرسیته، اداره، محلله و شهر‌ده، میللی دوشونجه‌لی انسان‌لاری تاپیب، اونلار ایله ارتباطا گئچیب گروه‌لاشیب سونرا تشکیلات‌لانین. تشکیلات‌دا مسئولیت عهده‌لن‌مه‌یه گؤنول‌لو اولون و وئریلن وظیفه‌لری قصورسوز شکیلده یئرینه یئتیریب، تعقیب ائدین. حرکتیمیزین وارلیغی، دواملی‌لیغینا باغلی‌دیر، لااوبالی‌لیک، دیسیپلین‌سیزلیک و متدسوزلوق‌دان اوزاق اولون. اوزاقدا خیال کیمی دوران بیر شئیی گؤرمه‌یه چالیشماق یئرینه، اؤنونوزده آچیقجا دوران ایشی گؤرون. سیزینله چالیشان میللی فعاللارا گووه‌نین، اونلارا بیر ایشی نئجه گؤوره‌جک‌لرینی آنلاتماق یئرینه نه ایش گؤره‌جک‌لرینی آنلادیب، اونلارین یارادیجیلیق‌لارینا فرصت وئرین.
