یئنی‌لیک، سینیرلاری آشماغین آچاری و گه‌لجه‌یی شکیل‌لن‌دیرن گوج‌دور. آددیملاری جسارت‌له آتماق و یئنی افق‌لره ایلرله‌مک‌دیر. یئنی‌لیک‌چی‌لیک رقابت ائتمک اوچون ده‌ییل، اویونون قایدالارینی ده‌ییش‌دیرمک اوچون چابالاماق‌دیر. هرکسین گؤردویونو گوروب آما کیمسه‌نین دوشونمه‌دی‌یینی دوشونمک‌دیر. گه‌له‌جه‌یی تخمین ائتمک یئرینه، گه‌له‌جه‌یی یاراتماق‌دیر. ائتدیک‌لریمیز قدر، ائتمدیک‌لریمیزدن ده غرور دویماقدیر، مینلرجه شئیه یوخ دئمک‌دیر. دوشوندویوندن داها بویوک دوشونمک‌دیر. هر بحرانی بیر فرصت بیلیب، شبهه ائتمه‌دن و جسارت ایله، یئنی بیر حمله پلانی قورماق‌دیر.
زمان ان بؤیوک یئنی‌لیک‌چی‌دیر، هر زمان یئنی چاره‌لر تاپمالی‌ییک یوخسا باشیمیزا یئنی بلالار گلر. ده‌ییش‌مه‌سک، یئنی‌لن‌مه‌سک، گنج‌لش‌مه‌سک، چورومه‌یه محکوم اولاریق. یئنی‌لیک‌چی‌لیک، ایچینده اولدوغوموز وضعیته قانع اولماییب، داها یئنی، انکشاف ائتمیش و مکملی ایسته‌ییب، یئنی یوللار و چاره‌لر تاپماق‌دیر. یئنی‌لیک‌چی‌لیک انسانلارا سهو حقی وئرمک‌دیر. سهولرله دولو، شرفلی بیر مجادله ائدن انسان، هیچ بیر ایش گؤرمه‌ین، ان پارلاق دوشونجه‌لی انسانلاردان داها فایدالی‌دیر. گونئی آذربایجان میللی حرکتی، خالقیمیزی داها اؤزگور و رفاه‌لی وضعیته گتیرمک اوچون یئنیلیک‌چی تدبیرلری، جسارت و اؤزونه گووه‌ن ایله بیرلش‌دیریب، گئجه-گوندوز دئمه‌دن میللی دولتیمیزین قورولماسی اوچون چالیشان، میللی بیر حرکت‌دیر.
یاشام گوجو اولان هر کهنه‌یی سئوریک، آما بیزی بوتون گوجو ایله یاشاداجاق تک شئی یئنیلیک‌دیر. یئنی دؤورلری یئنی اینسانلار تمثیل ائدر و یئنی بیر گون دوغارکن بیر چوخ اولدوز باتار. هیچ بیر دؤور، گئچمیش‌ده تجربه ائدیل‌میش اینسانلارین چیگین‌لرینده یوکسل‌مز. بونون اوچون، یئنی‌لیغین اساسی اولان گنج‌لره، داها چوخ دقت ائت‌مه‌لی‌ییک. میللی هدفیمیز، یعنی گونئی آذربایجان میللی دولتینی قورماق یولوندا یئنیل‌مز گوجوموز و گارانتی‌میز گنج‌لردیر. میللی حرکتین ظفری، اعتراض ائدن یئنی نسل ایله اولاجاق، اطاعت ائدن نسل ایله ده‌ییل. آرتیق احتیاط‌لا ایرانچیلیق دوشونجه‌سینین چیخماز کوچه‌لرینده یولونو آختاران و ایرانین چوروموش حکومت‌لرین‌ده اؤزونه فایدالی فرصت‌لر یاخالاماغا چالیشان، تمکین‌لی و تردد‌لی نسل یوخ‌دور. اونون یئرینه، دینامیک، مغرور و اؤزونه گووه‌ن‌لی بیر گونئی آذربایجان گنج‌لیغی وار. یئنی گنج‌لیک، اؤز حیاتینی یاشاماغا و سرنوشتینی اؤز اللرینده توتماغا عظم‌لی و اراده‌لی‌دیر. گونئی آذربایجانین پارلاق گله‌جه‌یی بو نسلین الینده‌دیر. قیزلاریمیز میللی دولتیمیزی، اوغلان‌لاریمیز ایسه، میللی اوردوموزو قوراجاق‌لار.
گونئی آذربایجان میللی حرکتی اولاراق، اؤز مدنیتیمیزده یئنی‌لیک‌لره یئر آچیب، باشقا میللت‌لرین چاغداش و دیرلی یؤنلرینی آلیب قایناش‌دیرمالی‌ییق. آما خالقیمیزی تحقیر ائده‌رک یا دا بیزی بیر میللت ائدن کؤک‌لریمیزی کسه‌رک ده‌ییل. میللت‌لر اولو بیر آغاج کیمیدیر، اولو بیر چینار، تورپاغین اوستونده نه قدر یوکسل‌میش‌سه، تورپاغین آلتیندا دا او قدر درین‌لره گئتمیش گئنیش کؤک‌لری واردیر. اولو بیر آغاجین کؤک‌لری کسیل‌سه او آغاجی یاشادماق و تورپاغین اوستونده دیک توت‌ماق ممکن ده‌ییل. بیر میللتین کؤک‌لری ده میللی تاریخی‌دیر، عادت عنعنه‌لری و اینانجلاریدیر. حقیقی یئنی‌لیک، آنجاق گئچمیشی بیلن‌لردن چیخار و قایناقلارا دؤنوش‌له باشلار.ان بؤیوک اردم، ایچینده اولدوغوموز وضعیتی بیلیب، ده‌یرله‌ندیریب، گوجه چئویریب، پیلله ائدیب داها چاغداش و گلیش‌میش بیر وضعیته داشیماق‌دیر.
